बारा,
मधेस सरकारको गृह, सञ्चार तथा कानुन मन्त्रालयले हाल सम्मकै उच्च कार्यसम्पादन गर्न सफल भएको छ । मन्त्रालयले आ.ब. २०८१-८२ मा पूँजीगत खर्चमा ८२.९३ प्रतिशत प्रगति हासिल गर्दै प्रदेश सरकार स्थापना भएको ७ वर्षको इतिहासमा पहिलोपटक यति ठुलो उपलब्धी हासिल गर्न सफल भएको हो ।
गृह, सञ्चार तथा कानुन मन्त्रालयमा राजकुमार लेखी आएपछी मन्त्रालय विगतको वर्ष भन्दा निकै चलायमान भएको थियो । मन्त्रालयले पूँजीगत खर्च तर्फ ८२.९३ प्रतिशत प्रगति गरेपनि चालुतर्फ ५४.३७ प्रतिशत मात्र खर्च गरेको छ । चालु खर्चमा मितव्ययिता अपनाएको र फजुल खर्च नियन्त्रणमा लिएको भन्दै यसलाई सकारात्मक संकेतको रूपमा लिएको मन्त्रालयले जनाएको छ । यता गृहमन्त्री लेखीले मन्त्रालयको चालु खर्चतर्फ अत्यावश्यक शीर्षकबाहेकका खर्चमा पूर्णरूपमा रोक लगाइएकोले खर्च न्यून देखिएको बताए ।
गृह, सञ्चार तथा कानुन मन्त्रालय विकासमुखी मन्त्रालय नभएकाले तालिम, गोष्ठी, कार्यशाला जस्ता शीर्षकमा अत्यन्त मितव्ययी ढंगले खर्च गरिएको कारणले पूँजीगत खर्च शतप्रतिशत हुन नसकेको प्रदेश सचिव विमल प्रसाद बरालले बताए ।
