चितवन, साउन १०–
चितवन प्रहरीले साँढे ६ क्वीन्टल बढी गाँजासहित एक जना भारतीय नागरिकलाई पक्राउ गरेको छ ।
चितवनबाट मकवानपुरतर्फ जाँदै गरेको भारतीय कन्टेनरबाट राप्ती–१, स्थित लोथर पुल नजिकबाट उक्त गाँजासहित कन्टेनर नियन्त्रणमा लिइएको जिल्ला प्रहरी कार्यालय चितवनका प्रमुख गोविन्द पुरीले जानकारी दिनुभयो । विशेष सूचनाको आधारमा आज बिहान ४ बजेको समयमा भारतीय नम्बर प्लेट युपी ८२ टी ३९२१ नम्बरको कन्टेनर ट्रक चेकजाँच गर्दा ६७१ किलो ६ सय ग्रामको ४३ वटा पोका गाँजा बरामद गरिएको प्रहरी प्रमुख पुरीले जानकारी दिनुभयो । प्रहरीले कन्टेनर चालक भारत बिहार राज्य पूर्वी चम्पारणको तुर्कालिया बस्ने वर्ष ३७ का शेख सविल अख्तरलाई पक्राउ गरेको छ ।
काठमाडौंबाट सामान पुर्याएर खाली फर्किएको कन्टेनरमा चितवनको राप्तीबाट गाँजा लोड गरेर वीरगञ्ज हुँदै भारत लैजादै गरेको प्रारम्भिक अनुसन्धानबाट खुलेको सूचना अधिकारी रविन्द्र खनालले जानकारी दिनुभयो । उक्त गाजा कन्टेनरको ड्राइभर क्याबिनको माथिल्लो भागमा फल्स बटन बनाइ प्याकिङ गरिएको अवस्थामा फेला परेको थियो ।
